កម្ពុជា -ថៃ បើកសិក្ខាសាលាទ្វេភាគីស្តីពីការព្យាបាលស្តារនីតិសម្បទាអ្នកញៀនគ្រឿងញៀន នៅខេត្តស៊ីសាកេត ប្រទេសថៃ
12-February-2019 | ដោយ ពលមនសិការ
ប្រទេសថៃ៖ ចាប់ពីថ្ងៃទី១១-១៣ ខែកុម្ភៈ ឆ្នាំ២០១៩ ក្រោយទទួលបានគោលការណ៍អនុញ្ញាតពីឯកឧត្តម នាយឧត្តមសេនីយ៍ កែ គឹមយ៉ាន ឧបនាយករដ្ឋមន្ត្រី ប្រធានអាជ្ញាធរជាតិប្រយុទ្ធប្រឆាំងគ្រឿងញៀន មន្ត្រីទទួលការងារព្យាបាលស្តារនីតិសម្បទាអ្នកញៀនគ្រឿងញៀនចំនួន២០រូបបានទៅចូលរួមសិក្ខាសាលាទ្វេភាគីកម្ពុជា-ថៃ ស្តីពីការព្យាបាល និងស្តារនីតិសម្បទាអ្នកញៀនគ្រឿងញៀន នៅខេត្តស៊ីសាកេត ប្រទេសថៃ។
លោកវេជ្ជបណ្ឌិត សារ៉ាយុទ្ធ ប៊ុនចៃផានិចវឌ្ឍានា SarayuthBoonchaipanichwattana ប្រធានវិទ្យាស្ថានជាតិព្យាបាលអ្នកញៀនគ្រឿងញៀនរបស់ម្ចាស់ស្ត្រីថៃ (PMNDAT)បានថ្លែងស្វាគមន៍យ៉ាងកក់ក្តៅចំពោះសិក្ខាកាមមកពីកម្ពុជាទាំងអស់ និងបានលើកសសើរដល់កិច្ចខិតខំរបស់ភាគីកម្ពុជាលើការងារព្យាបាលស្តារនីតិសម្បទាអ្នកញៀនគ្រឿងញៀន ក៏ដូចជាការទប់ស្កាត់ បង្ក្រាបបទល្មើសគ្រឿងញៀនឆ្លងកាត់ព្រំដែនថែរក្សាបាននូវសន្តិសុខជូនប្រជាពលរដ្ឋនៅតាមបណ្តោយព្រំដែនប្រទេសជាតិយើងទាំងពីរកម្ពុជា-ថៃ។
ក្នុងឱកាសនោះ លោកជំទាវ ឧត្ដមសេនីយ៍ឯក ជ័យ បុប្ផា អគ្គលេខាធិការរងនៃអាជ្ញាធរជាតិប្រយុទ្ធប្រឆាំងគ្រឿងញៀន ប្រធានដឹកនាំសិក្ខាកាមបានថ្លែងថា រហូតមកទល់ពេលនេះ កម្ពុជា-ថៃ នៅតែបន្តទទួលរងឥទ្ធិពលពីការចរាចរគ្រឿងញៀនឆ្លងកាត់ដែលមានប្រភពផ្សេងៗ ទាំងមកពីក្នុងនិងក្រៅតំបន់ ហើយការចរាចរគ្រឿងញៀនឆ្លងកាត់នេះ បាននិងកំពុងបន្តបង្កនូវផលប៉ះពាល់យ៉ាងច្រើនដល់សុខភាព និងជីវភាពរបស់ប្រជាពលរដ្ឋ ប៉ះពាល់ដល់សន្តិសុខ សណ្តាប់ធ្នាប់សាធារណៈ និងការអភិវឌ្ឈសង្គម ។ ដោយឡែកកម្ពុជាក្នុងឆ្នាំ២០១៨នេះ រកឃើញអ្នកប្រើប្រាស់គ្រឿងញៀនចំនួន ប្រមាណជាង២ម៉ឺននាក់ ដែលចំនួននេះគឺមានការកើនឡើងបើធៀបនឹងឆ្នាំ២០១៧ដោយហេតុថាកម្ពុជាបានរកឃើញអ្នកញៀនគ្រឿងញៀនដែលលាក់ខ្លួនពីសមត្ថកិច្ច ហើយស្ម័គ្រចិត្តទៅទទួលយកសេវាព្យាបាលនៅតាមមណ្ឌលបណ្តោះអាសន្ន និងមូលដ្ឋានសុខាភិបាលក្នុងសហគមន៍។
ក្នុងឱកាសដ៏ថ្លៃថ្លានោះដែរ លោកជំទាវ ឧត្ដមសេនីយ៍ឯក ជ័យ បុប្ផា បានថ្លែងបន្តដោយពាំនាំនូវការកោតសរសើរដោយស្មោះ និងថ្លែងអំណរគុណយ៉ាងជ្រាលជ្រៅបំផុតពីថ្នាក់ដឹកនាំអាជ្ញាធរជាតិប្រយុទ្ធប្រឆាំងគ្រឿងញៀនកម្ពុជា ចំពោះក្រុមប្រឹក្សាត្រួតពិនិត្យគ្រឿងញៀនថៃ (ONCB) ក្រសួងសុខភាពសាធារណថៃ ដែលបានផ្តល់នូវកិច្ចសហប្រតិបត្តិការល្អគាំទ្រជាបន្តបន្ទាប់ទាំងលើផ្នែកពង្រឹងសមត្ថភាព សម្ភារៈ បច្ចេកទេស ក៏ដូចជាថវិកា ដែលធ្វើឱ្យការងារត្រួតពិនិត្យគ្រឿងញៀននៅកម្ពុជាមានការប្រែប្រួលជាវិជ្ជមានពីមួយឆ្នាំទៅមួយឆ្នាំ ៕
ចំនួនអ្នកទស្សនា
- ថ្ងៃនេះ3911
- ម្សិលមិញ11441
- សប្តាហ៍នេះ33741
- ខែនេះ148891
- ឆ្នាំនេះ148891
- សរុប20591347